ಕೋಳ್ಯೂರುರವರು ಸ್ತ್ರೀ ವೇಷದ ವಿವಿಧ ಪ್ರಾಕಾರಗಳ ಅಭಿನಯವನ್ನು ಅಭ್ಯಸಿಸಿ ಮೆರೆದವರು. ರಾಣಿ, ನಾಯಕಿ, ಮಾಯಾಂಗನೆ, ಹಾಗೂ ದಟ್ಟಿಕಸೆ ಮೊದಲಾದ ವೇಷಗಳನ್ನು ಕಲಾ ಪ್ರೇಕ್ಷಕರ ಮನದಾಳದಲ್ಲಿ ಅಚ್ಚಳಿಯದೆ ಇರುವ ರೀತಿಯಲ್ಲಿ ಅಭಿನಯಿಸಿ, ಅನುಭವಿಸಿದವರು. ಉದಾಹರಣೆಗೆ: ದಮಯಂತಿ, ಸೀತೆ, ಸುಭದ್ರೆ, ಮಂಡೋದರಿಯಂತಹ ರಾಣಿಯ ಪಾತ್ರಗಳು; ದೇವಯಾನಿ, ಚಂದ್ರಾವಳಿ, ರಾಧೆ, ರುಕ್ಮುಣೀ, ದಾಕ್ಷಾಯಿಣಿ, ಕೈಕೇಯಿ, ಅಂಬೆ ಇತ್ಯಾದಿ ನಾಯಕಿಯರ ಪಾತ್ರ ; ಮೋಹಿನಿ, ಮೇನಕೆ, ಮಾಯಾ ಶೂರ್ಪನಖಿ, ಹಿಡಿಂಬೆ, ಪೂತನಿ ಮೊದಲಾದ ಮಾಯಾಂಗನೆಯರ ಪಾತ್ರಗಳಲ್ಲದೇ; ಶಶಿಪ್ರಭೆ, ಭ್ರಮರಕುಂತಳೆ, ಪ್ರಮೀಳೆ, ಮೀನಾಕ್ಷಿ ಎಂಬಿತ್ಯಾದಿ ದಟ್ಟಿಕಸೆ ವೇಷಗಳನ್ನು ಧರಿಸಿ ಆಯಾ ಪಾತ್ರಗಳಿಗೆ ಸನ್ನಿವೇಷಕ್ಕೆ ತಕ್ಕಂತೆ ಜೀವವನ್ನು ತುಂಬಿ ಚಾಕಚಕ್ಯತೆಯಿಂದ ಕಲಾಭಿಮಾನಿಗಳ ಮನಸೂರೆಗೊಂಡಂತಹ ಅಪ್ರತಿಮ ಯಕ್ಷಗಾನ ಕಲಾವಿದರಿವರು.